"Niyyət" (2010) — rejissor Samir Kərimoğlunun quruluş verdiyi, "Azərbaycanfilm" kinostudiyasında dövlət sifarişi ilə ərsəyə gətirilmiş yüksək tənqid alan və uğurlu psixoloji dram janrında olan Azərbaycan bədii filmidir. Ssenari müəllifi Yavər Rzayev, bədii rəhbəri isə Rüstəm İbrahimbəyov olan film, iki tamamilə fərqli dünya görüşünə malik gəncin taleyindən və kamil insan axtarışından bəhs edir. Süjetə əsasən, gününü qumar, içki və mənasız əyləncələrlə keçirən Cahangir (Fuad Axundov) ilə mənəvi dünyası zəngin, dindar və kamil bir gənc olan Arifin (Rövşən Məmmədli) həyat yolları kəsişir.